Le Gouvernement du Grand Duché de Luxembourg
luxembourg.lu   guichet.lu   gouvernement.lu   Aner Säiten

#regionalsaisonal

Regional

Saisonal

Zu Lëtzebuerg froen ëmmer méi Leit no regional a saisonal produzéierte Liewensmëttelen. An engem klenge Land wéi Lëtzebuerg ass déi national Produktioun gutt ze iwwerblécken. Dat suergt fir Transparenz a schaaft Vertrauen an d’Produktioun vu regionale Liewensmëttelen.

10 Grënn, firwat lokal a saisonal Iesswuere voll am Trend sinn!

1

Ënnerstëtzung vun de Lëtzebuerger Baueren, Wënzer, Gäertner an der lokaler Veraarbechtungsketten
+
Lokal kleng Bauere kënne schwéierlech mat grousse Liewensmëttelkette konkurréieren an déi nämmlecht Variatioun u Produkter ubidden. Trotzdeem gëllt och hei: Ouni d’Bauere keng Liewensmëttelen! Si sinn et, déi fir eis Iessen op den Dësch bréngen an doriwwer eraus verflichten se sech, héich Standarden a punkto Ëmweltschutz, Déiereschutz a Konsumenteschutz anzehalen.

2

Regional a saisonal Kafentscheedung als Statement
+
De Client ass Kinnek! All Akaf ass eng perséinlech Entscheedung fir oder géint e méi faire Landwirtschafts-, Wirtschafts- a Gesellschaftsmodell.

3

Produkter vun doheem sti fir Identitéit
+
Et bäisst ee léiwer an en Apel, deen am Bongert vum Nopeschduerf gewuess ass, wéi an en anonymt Produkt vum aneren Enn vun der Welt. A firwat sollt een Eeër a Mëllech vu wäit ewech komme loossen, wann se virun der Hausdier ze kréie sinn?

4

Eng regional a saisonal Liewensmëttelproduktioun huet och eng sozial Komponent
+
Tëschent dem Produzent an dem Konsument entsteet e perséinleche Kontakt. Doduerch léiert de Verbraucher d’Aarbecht, déi an der Liewensmëttelproduktioun stécht, ze schätzen.

5

Saisonal an lokal Liewensmëttele schounen d’Ëmwelt
+
D’Zille vun Uebst a Geméis am Fräien, kuerz Transportweeër mat deementspriechend manner Zäregasemissiounen a verkierzte Lagerzäiten droen zu enger nohalteger Ernärung bäi.

6

Saisonal a regional Liewensmëttele sinn net nëmme méi gesond, ma schmaachen och besser
+
Well d’Transportweeër immens kuerz sinn, kommen se frësch an zeideg an de Buttek, wat gäre fir eng besser Qualitéit suergt. Wien sech e bëssen auskennt a weess, wat wéini zeideg ass, a säi Kafverhalen dorop ofstëmmt, gëtt dacks mat engem aussergewéinleche Geschmaachserliefnes belount. Déi kuerz Weeër wierke sech esouwuel positiv op de Gomm wéi och op wäertvoll Inhaltsstoffer wéi Vitaminnen a Mineralstoffer aus!

7

Regional Liewensmëttele schafe Vertrauen
+
E klengt Land wéi Lëtzebuerg huet de Virdeel, datt déi national Liewensmëttelproduktioun gutt ze iwwerblécken ass. Déi verschidde Produktiounsprozesser kënne liicht zeréckverfollegt ginn, doduerch kënnt et net esou séier zu Liewensmëttelskandaler. Et suergt och fir Transparenz a schaaft Vertrauen an d’Qualitéit an d’Sécherheet vun de Produkter.

8

Antigaspi
+
Duerch kuerz Liwwerweeër verdierwe manner Liewensmëttel um Wee an de Buttek. Wann een also regional Produkter keeft, mécht een och eppes géint d’Liewensmëttelverschwendung. Méi dozou op antigaspi.lu.
+

9

Eng saisonal Menüskaart
+
Eng saisonal Menüskaart féiert zu engem bessere Gefill fir d’Joreszäiten, a vläicht entdeckt een erëm Geméis- an Uebstzorten, déi an de Vergiess gerode sinn.

10

Bauererezepter a Stärekichen op gutt Lëtzebuergesch
+
D’Groussmamm an der eegener Kichen an de Kach am exklusive Stärerestaurant: d’Lëtzebuerger Kachkultur huet sech ëmmer schonn duerch den Asaz vu frësche Kraider, frëschem Geméis, Uebst a Fleesch aus der Regioun ausgezeechent. An der Gastronomie läit d’Lëtzebuerger Bauerekichen déck am Trend. Op ville Kaarte fënnt een traditionell Plate wéi Bouneschlupp, Kniddelen a Feierstengszalot.

Wat bedeit

Regional?

Gromperen aus dem Éislek, Äppel aus Lëtzebuerg: Jee no Produkt a Joreszäit gëllen ënnerschiddlech Distanze fir e regionaalt Liewensmëttel. Et ass net sënnvoll, d’Transportweeër op eng bestëmmte Kilometerzuel ze fixéieren.

„Regional“ ass deemno net prezis festgeluecht a gesetzlech net definéiert. Grondsätzlech schwätzt ee vu regionale Liewensmëttelen, wann déi bannent enger begrenzter Regioun hiergestallt, verschafft a vermaart ginn.

Et schuet also net, den Händler ze froen, wouhier d’Produkter stamen, déi a sengem Buttek verkaaft ginn, a wéi eng Krittäre fir déi als „regional“ ugebuede Liewensmëttele gëllen.

Regional gläich lokal?

Regional heescht net onbedéngt lokal, och wa vill Konsumenten dovun ausginn. Tatsächlech bezitt sech de regionalen Akaf ëmmer op e groussflächege Raum, bannent deem déi jeeweileg Wueren hiergestallt ginn. De Begrëff „lokal“ ass nach e bësse méi genee a bezeechent e méi klenge geografesche Raum, wéi zum Beispill eng bestëmmte Plaz an enger Regioun.

Wat bedeit

SaisonAL?

Eng saisonal a regional Ernärung bedeit, sech vu Liewensmëttelen ze ernären, déi an der Regioun an an der aktueller Joreszäit produzéiert ginn. Deemno bedeit eng regional Ernärung gläichzäiteg, datt een sech saisonal ernäert. Ëmgedréit bedeit eng saisonal Ernärung net automatesch, datt een nëmme regional Produkter konsuméiert. Well et ass ëmmer iergendwou op der Welt Summer.

D’Globaliséierung erméiglecht et eis, dat ganzt Joer duerch alles un Uebst a Geméis ze kafen wat et an der Welt gëtt. Et gëtt ëmmer méi Uebst a Geméis importéiert, dat op der Südhallefkugel gezillt gëtt, wat dozou féiert, datt mir vergiessen, datt déi verschidden Uebst- a Geméiszorte net d’ganzt Joer Saison hunn. Musse mer am Wanter onbedéngt Äerdbier iessen, déi vum Goût hier souwisou éischter u Waasser mat Äerdbiersgoût erënneren?

Eng saisonal Menüskaart dergéint féiert zu engem bessere Gefill fir d’Joreszäiten, an et entdeckt ee vläicht erëm Geméis- an Uebstzorten, déi längst an de Vergiess gerode sinn.

Sitemap

Kontaktéiert eis

Ministère fir Landwirtschaft, Wäibau a ländlech Entwécklung

1, rue de la Congrégation
L – 1352 Luxemburg

info@ma.etat.lu

(+352) 247-82500

Social Media

Facebook-square Instagram Youtube

© 2021 Regional & Saisonal – All Rechter virbehalen

Rechtlech Hiweiser  | Informatiounen iwwert den Internetsite | Accessibilitéitserklärung