REgional & saisonal

REzepter

Grompere-Muerte-Gratin

Share on facebook
Share on pinterest
Share on email

mat grénger Zalot

Grompere schielen, wäschen an a graff Stécker schneiden. A Salzwaasser zougedeckt 20-25 Min. kachen. Ofschëdden a bei ganz niddreger Hëtzt am oppenen Dëppen ausdënste loossen. 185 ml Mëllech, 50 g Botter, e bësse Salz, Peffer a frësch geriwwe Muskotnoss opkachen. D’Grompere mam Handmixer am Dëppe reng zerklengeren. Déi kachend Mëllechmëschung ënnerréieren, evt. nach eng Kéier wierzen. De Gromperepüree soll gutt cremeg sinn, fir datt e besser verdeelt ka ginn.

D’Muerte schielen, botzen an a kleng Stécker schneiden. Geméisbritt erhëtzen an d’Muerten doranner mëll kachen. Wa néideg, Geméisbritt noschëdden. Muerte mat Botter, Salz, Peffer a Muskot mat engem Püréierstaf püréieren.

D’Gratinsform afetten an d’Hallschent vum Gromperepüree dra verdeelen. Dorop dann de Muertepüree gläichméisseg verdeelen, an dorop de Rescht vum Gromperepüree. De gerappte Kéis driwwer streeën an dat Ganzt an de virgehëtzte Bakuewe stellen. Bei 180°C 25 bis 30 Minutte goldgiel baken.

Déi baussecht Blieder vu der Lollo Rosso evt. ewechhuelen. D’Zaloteblieder a mondgerecht Stécker rappen an am kale Waasser wäschen.

Fir d’Zalotenzooss d’Zwiwwele schielen an a kleng Wierfele schneiden. De Péiterséileg wäschen a fein hacken. Esseg, Moschtert, Zwiwwelen a Péiterséileg vermëschen. Ueleg dobäiginn, bis eng cremeg Zooss entsteet. Mat Salz a Peffer wierzen.

Kartoffel-Karotten-Auflauf mit grünem Salat

Virbereedungs- a Kachzäit: 60 Minutten

Antigaspi-Tipp

D‘Muerteschuelen an d’Stiller vum Péiterséileg kënne fir d’Geméisbritt geholl ginn.

Gudden Appetit!

Fir 4 Persoune braucht Dir:

Fir de Gromperepüree
750 g Gromperen (mieleg)
185 ml Mëllech
50 g Botter
Salz a Peffer
Muskotnoss (frësch geriwwen)

Fir de Muertepüree
500 g Muerten
500 ml Geméisbritt
30 g Botter
1 Prise Muskotnoss
Salz a Peffer

1 Heed Lollo Rosso

Fir d’Zalotenzooss
1 Téiläffel Moschtert
2 Iessläffel Esseg
4 Iessläffel Rapsueleg
½ Zwiwwel
½ Bond frësche Péiterséileg
Salz a Peffer

Kéis (gerappt) fir ze Iwwerbaken

Rezept presentéiert vun der

Maison Relais „An de Wolleken“ zu Duelem

Philosophie

D’Maison Relais „An de Wolleken“ vun der Fondation Elisabeth leit matten am Gréngen, ëmgi vu Felder a Bësch. D’Kanner, déi hei betreit ginn, ginn als kompetent an aktiv Acteuren ugesinn, hiren Input bei der Gestaltung vun de Wochepläng ass de Pedagoge ganz wichteg. D’Gesondheet, d’Wuelbefannen an d’Wäertschätzung vun de Kanner steet un éischter Platz. Nohaltegkeet spillt am Konzept vum Haus eng bedeitend Roll a gëtt och mat de Kanner thematiséiert. Wat um Menü steet beaflosst d’Ernierung an d’Iessverhale vun de Kanner. D’Offer ass deementspriechend gesond an equilibréiert.

„Mir ass et wichteg, datt an eiser Kiche mat regionale Produiten déi an der Saison si gekacht gëtt, well mir da wëssen, wou a wéi se ugebaut, resp. hiergestallt ginn“, seet de Kichechef Bernd Kraemer.

Mir kënne sou de Wee vum Somkär bis zur Planz zréckverfollegen, bis an eis Kichen, ouni datt een Tëschenhändler involvéiert ass. Déi kuerz Liwwerweeër garantéieren eis, datt d’Liewensmëttel frësch sinn an eng gutt Qualitéit hunn.

Him läit och um Häerz, déi regional Hiersteller ze ënnerstëtzen. „Duerch de perséinleche Kontakt zum Produzent besteet tëschent eis ee Vertrauensverhältnes.“

Den edukativen Aspekt ass och relevant: 

Eise Menü mat saisonale Liewensmëttel aus regionaler Produktioun weist de Kanner, wéi eng Uebst- a Geméiszorten a wéi enger Joreszäit zu Lëtzebuerg zeideg sinn.

 

Maacht mat a schéckt

Maacht mat a schéckt

eis Äert Liblingsrezept

Saisonal

Rezepter

Vill Spaass beim Nokachen!