REgional & saisonal

REzepter

Schwéngsbake an enger Hunneg-Béier-Zooss op Pastinakepüree

D'Schwéngsbaken, déi virdru gewierzt goufen, an engem Dëppe kachen (wärend 2 Stonne lues goe loossen). D'Ënn am Botter broden, bis se eng schéi Faarf huet, den Hunneg draschëdden a karamelliséiere loossen. De Béier, d'Gewierzer, den Esseg an d'Korinten draschëdden an ëm dräi Véierel reduzéiere loossen. No der Reduktioun wierzen a mam Maizena bannen. D'Schwéngsbake bei niddreger Temperatur an d'Zooss leeën, fir se waarm ze halen. D'Pastinake schielen an a grouss Wierfele schneiden, déi dann a Salzwaasser kachen (12-15 Minutten) an duerno mat engem Schotz Ram an enger Pouz Muskot mixen. Ofschmaachen an eventuell d'Konsistenz upassen. D'Schwéngsbaken op dem Pastinakepüree uriichten. Als Bäilag e Gromperegratin oder frësch Nuddelen zerwéieren.

4 Persounen
2,5 Stonnen

Gudden Appetit!

Dir braucht

600 g Schwéngsbaken
1 grouss Ënn
4 Pastinaken (ongeféier 275 g)
1 Liter Lëtzebuerger Béier (donkel)
80 g Botter
100 ml Vollmëllech
Maizena
1 bis 2 Iessläffelen Apelesseg
1 bis 2 Iessläffele Lëtzebuerger Hunneg
1 bis 2 Iessläffele Korinten
2 Lorberblieder
1 Strauss Thymian
3 Blieder Majoran
Kleng geschniddene Péiterséileg
Salz, Peffer

 

Rezept presentéiert vum

Restaurant Aux Tanneries
de Wiltz

Philosophie
D'Gewëssheet, mat saisonale Produiten ze schaffen, déi mat Léift an ausserhalb vun den industriellen Zyklen hiergestallt goufen, ass de Grond, firwat de Chefkach Olivier Tilmant léiwer lokal Produite benotzt. Ausserdeem sinn „net industrialiséiert“ Produiten eng Garantie dofir, datt qualitativ héichwäertege Matière-premièren ouni cheemesch Zousazstoffer, wéi een se dacks an de Produiten aus der Masseproduktioun fënnt, benotzt ginn.
Fir d'Ekipp vum Restaurant Aux Tanneries de Wiltz ass et komplett onsënneg, mat Produite vum aneren Enn vun der Welt ze schaffen. „Éischtens aus ekologescher Siicht (groussen CO2-Foussofdrock), mee och aus Respekt virun enger Regioun, déi esou vill ze bidden huet. Natierlech verstousse mir och emol géint dëse Prinzip wa mir beispillsweis exotescht Uebst aus fairem Handel fir eis Desserten huelen“, sou den Olivier Tilmant.
An der Wantersaison gräife mir an éischter Linn op Wëld, wat an eise Bëscher gejot gouf, a Geméiszorten zréck, déi der kaler Joreszäit ugepasst sinn, wéi Kabes oder Rommelen. D'Feinschmecker wëssen, datt dat saisonaalt Uebst a Geméis absolut fir eis Besoine gëeegent ass an eis hëlleft, de Wanter iwwer gesond ze bleiwen! Aus Respekt virun eise Produzente kache mir esou vill wéi méiglech mat schounende Methoden, fir d'Qualitéit vun hire Produiten esou gutt wéi méiglech ze erhalen.

Maacht mat a schéckt

Maacht mat a schéckt

eis Äert Liblingsrezept

Saisonal

Rezepter

Vill Spaass beim Nokachen!